Usul SAPP popotood projik pohuzungan giis hiniad

18th November, 2008

KUALA LUMPUR:Ponginaman do Paati Kobuuon Sabah (SAPP) montok popoimbuhai usul montok popotingkod projik pohuzungan giis Petronas mantad depot Kimanis id Sabah kumaa id Bintulu, Sarawak, kisinodu 500 kilometer diho nopo nga au nahantoi di songian o Hintuun Layat do doiti om Hintuun Koundangan Pogun (DUN) Sabah do mininamot minomohiad usul nokomoi di koniab.

Duuduvo hintuu diho nokopitumbozo do usul kokomoi projik kigatang RM3 bilion diho do pointanud ahal pointantu om kokomoi do kounalan ginumun, nga au tagal iho do posikapon.

Hiniad di Kumoduvo Mohoingon Hintuun Layat, i Datuk Wan Junaidi Tuanku Jaafar o usul do hahansanon layat Sepanggar, i Datuk Eric Majimbun, naanot di Momumuntu toi Speaker Datuk Juhar Mahiruddin, minomohiad do usul puu Hintuun Koundagnan Pogun (DUN) Likas, i Datuk Liew Teck Chan id Kota Kinabalu.

Di ontok poimbuhazo di Eric o usul diho, minoboos do giis tinagas di nukab nopo nga ontodonon tinagas do pogun Sabah, mantad diho do mositi poopuvon mahik kumaa id pogun Id Saau Ibut (di Bawah Bayu) nokomoi.

Naamot di Juhar nopo nga minoboos do kivaav kosivatan di Liew di poinggonop montok popoimbuhai ahal nokomoi id piboosan id pitimbungakan DUN di opupusan ontok tadau Kotohu diti.

Pinopovuhai i Liew do nutis usul nokomoi di ontok pambantangan bajet pogun Sabah di tadau Kohimo nakatahib montok popoboos do projik diho i pinoimbuhai do kogumuan puu Hintuu i mimang do projik diho do potoodon montok kounalan do layat Sabah.

Di kavavagu diti, pinopoboos o Kopolintaan Pisompuuvan do projik Petronas diho nopo nga potihombuson om montok mogovit noopo giis nokohobi kumaa id Sarawak om pomounan petrokimia nopo nga ukabon id Sabah. Pisosoomo iho do opongo ontok Vuhan Kotohu 2011.

Reference: Gas Pipeline, kadazan, dusun, kimanis,bintulu,motion